 |
| លោកស្រី ប៊ូ រចនា និងកូនៗ របស់លោក កែម ឡី ដែលកំពុងរស់នៅប្រទេសអូស្ត្រាលី។ រូបថត ហ្វេសប៊ុក |
ម៉ិច ដារ៉ា and យន់ ស៊ីនាត | ភ្នំពេញ ប៉ុស្តិ៍
Publication date 07 March 2018 | 19:32 ICT
ភ្នំពេញៈ លោកស្រី ប៊ូ រចនា ដែលកំពុងរស់នៅក្នុងប្រទេសអូស្ត្រាលី បានសរសេរនៅលើហ្វេសប៊ុកប៉ុន្មានម៉ោងមុន នៅថ្ងៃនេះ បានបង្ហាញពីក្ដីកង្វល់ដែលនឹងនាំមកឲ្យប៉ះពាល់កិត្តិយសប្ដីលោកស្រី ក្រោយពីបុគ្គលមួយចំនួនបានបង្កើតគណបក្សនយោបាយថ្មីមួយដោយបានដាក់ឈ្មោះថា គណបក្សកែមឡី។
លោកស្រី ប៊ូ រចនា ជាភរិយាលោក កែម ឡី ដែលជាអ្នកវិភាគម្នាក់នៅក្នុងអង្គការសង្គមស៊ីវិល ត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃ នៅកណ្ដាលទីក្រុងភ្នំពេញ ដែលមានមនុស្សច្រើនកុះករកាលពីថ្ងៃទី ១០ ខែកក្កដា ឆ្នាំ ២០១៦។
អ្នកស្រី ប៊ូ រចនា បានថ្លែងចោទ លោកគុជ លី ដែលជាស្ថាបនិក និងជាអ្នកនាំពាក្យ របស់ គណបក្សកែមឡី ថា ត្រូវបានគេបញ្ជាឲ្យមកបំផ្លាញ កេរ្តិ៍ឈ្មោះនិងកិត្តិយស លោក កែម ឡី ដែលបានស្លាប់ទៅហើយនោះ។
លោក កែម រិទ្ធិសិត ប្អូនប្រុសបង្កើតលោក កែម ឡី និងលោក គុជ លី បានប្រកាសបង្កើតគណបក្សនយោបាយមួយថ្មីទៀតបានដាក់ឈ្មោះថា គណបក្សកែមឡី។ ការបង្កើតបក្សនេះ គឺដើម្បីយកទស្សនទានល្អៗ របស់លោក កែម ឡី ទៅចូលរួមចំណែកក្នុងការអភិវឌ្ឍប្រទេសជាតិនិងទប់ស្កាត់ការយកឈ្មោះលោក កែម ឡី ប្រើជាឧបករណ៍កេងចំណេញខាងនយោបាយ ដោយសារលោកទទួលបានការគាំទ្រច្រើនពីសាធារណជន។
លោកស្រី ប៊ូ រចនា បានសរសេរលើហ្វេសប៊ុក ផ្ទាល់ខ្លួនថា៖«ខ្ញុំសូមបញ្ជាក់ជម្រាបជូនដំណឹងទៅកាន់បងប្អូនជនរួមឈាមខ្មែរនៅប្រទេសកម្ពុជានិងនៅឯនាយសមុទ្រ ឲ្យបានជ្រាបថា លោកគុជ លី គឺជាមនុស្សដែលគេបញ្ជាឲ្យមកបំផ្លាញ កេរ្តិ៍ឈ្មោះនិងកិត្តិយស ស្វាមីរបស់នាងខ្ញុំ។ តាមបំផ្លាញគុណសម្បត្តិរបស់បងប្អូនដែលបានជួយជ្រោមជ្រែងដល់គ្រួសារនាងខ្ញុំតែប៉ុណ្ណោះទេ ជាពិសេសគឺព្រះអង្គ ប៊ុត ប៊ុនតិញ លោកប៉ាង ងួនទៀង លោកមឿន តុលា អាស្រ័យហេតុនេះ សូមបងប្អូនជនរួមឈាមខ្មែរនៅគ្រប់ទិសទីមេត្តាកុំជឿទៅលើការសម្តែងល្ខោនបោកប្រាស់របស់លោក គុជ លី»។
លោកគុជ លី បានថ្លែង កាលពីម្សិលមិញដោយបដិសេធមិនធ្វើអត្ថាធិប្បាយពាក់ព័ន្ធជាមួយបញ្ហាគ្រួសារនោះទេ។
លោក លី ថ្លែងថា៖«ខ្ញុំអត់ឆ្លើយទេ។ ពីព្រោះយើងធ្វើការងាររឿងសង្គមយើងមិនផ្តោតទៅលើគ្រួសារច្រើនទេ។ រឿងគ្រួសារបងឡីគឺជាលក្ខណៈរឿងគ្រួសារផ្ទាល់ខ្លួនទេ ហើយរឿងបងឡី គឺជារឿងទស្សនៈសង្គមដូចនេះរឿងដាច់ដោយឡែកពីគ្នាបើភា្ជប់ទៅរឿងគ្រួសារយើងធ្វើអីមិនចេញទេ»។
ទោះជាយ៉ាងណាក៏ដោយ ក្រសួងមហាផ្ទៃថ្មីៗនេះ មិនទាន់ទទួលស្គាល់ គណបក្សកែមឡី នៅឡើយទេដោយទាមទារឲ្យមានការកែតម្រូវចំណុចមួយចំនួនដែលទាក់ទងនឹងផ្លូវច្បាប់។
លោក លី ថ្លែងថា៖«យើងកំពុងតែនៅសិក្សារឿងផ្លូវច្បាប់។ យើងមានមេធាវីកំពុងធ្វើការផ្លូវច្បាប់ ដូច្នេះខ្ញុំមិនអាចឆ្លើយតបបានទេ…យើងត្រូវមានមេធាវីការពារយើងពីព្រោះគណបក្សនេះគឺគណបក្សមួយដែលរសើប»៕
Comments
Post a Comment