 |
| រូបឯកសារ៖ នាយករដ្ឋមន្រ្តីខ្មែរ លោក ហ៊ុន សែន។ |
កាន់ វិច្ឆិកា VOA Khmer 05 មិនា 2018
លោកហ៊ុន សែនអះអាងថា មានមន្ត្រីគណបក្សសង្គ្រោះជាតិខ្លះ ដែលត្រូវដកសិទ្ធិធ្វើនយោបាយបានសុំចរចា តែលោកបដិសេធ។
ភ្នំពេញ — នៅថ្ងៃច័ន្ទនេះ លោកនាយករដ្ឋមន្រ្តី ហ៊ុន សែន ថ្លែងថា មន្រ្តីគណបក្សប្រឆាំងមួយចំនួនដែលត្រូវបានតុលាការហាមឃាត់សិទ្ធិធ្វើនយោបាយ បានផ្ញើសារសុំលោកអនុញ្ញាតឲ្យធ្វើនយោបាយវិញ ប៉ុន្តែលោកថា លោកមិនទទួលយកការស្នើសុំការចរចាណាមួយពីមន្រ្តីគណបក្សប្រឆាំងដែលកំពុងប្រឈមនឹងផ្លូវច្បាប់ និងអ្នកដែលត្រូវបានតុលាការព្យួរសិទ្ធិធ្វើនយោបាយនោះទេ។
ក្នុងពិធីសម្ពោធសមិទ្ធិផលនានាក្នុងវត្តឈូកវ៉ា រាជធានីភ្នំពេញ នាព្រឹកថ្ងៃទី៥ ខែមីនានេះ លោក ហ៊ុន សែន ថ្លែងថា កាលពីថ្ងៃអាទិត្យមានអ្នកផ្ញើលិខិត និងផ្ញើសារទៅលោកដើម្បីសុំឲ្យមានការចរចានយោបាយ និងសុំឲ្យលោកអនុញ្ញាតឲ្យអ្នកដែលត្រូវបានព្យួរសិទ្ធិនយោបាយមួយចំនួន បានចូលមកធ្វើនយោបាយវិញ។ លោកបន្តថា លោកបានឆ្លើយតបត្រឡប់ទៅវិញថា កម្ពុជាមិនទាន់មានច្បាប់ចែងពីការស្នើឲ្យលើកលែងការព្យួរសិទ្ធិនយោបាយ ដូចករណីអ្នកជាប់ពន្ធនាគារដែលអាចស្នើឲ្យនាយករដ្ឋមន្រ្តីស្នើទៅព្រះមហាក្សត្រឲ្យលើកលែងទោសនោះទេ។
លោកមានប្រសាសន៍ដោយមិនបញ្ចេញឈ្មោះអ្នកដែលផ្ញើសារទៅលោកថា៖ «លោកពូជាទីគោរព ក្មួយចង់ផ្តល់ព័ត៌មានជូនលោកពូឲ្យបានជ្រាប មុនលោកពូចាកចេញទៅប្រទេសអូស្រ្តាលី។ ពួកយើងខ្ញុំមួយចំនួនក្នុងចំណោម១១៨នាក់ ចង់បានសិទ្ធិធ្វើនយោបាយឡើងវិញ សូមលោកពូមេត្តាជ្រាប និងពិចារណាដោយក្តីអនុគ្រោះ ដោយគោរពបំផុត"។ អាហ្នឹងដូចទើបតែនិយាយអញ្ចឹង។
ហើយក៏ឆ្លើយត្រឡប់ទៅវិញថា តុលាការកាត់សិទ្ធិនយោបាយ ពុំទាន់មានច្បាប់លើកលែងឲ្យទេ»។
លោក ហ៊ុន សែន បានប្រកាសថា ក្រៅពីការមិនចរចាជាមួយមន្រ្តីគណបក្សប្រឆាំង ដែលត្រូវបានតុលាការព្យួរសិទ្ធិធ្វើនយោបាយទាំងជាង១០០នាក់នោះ លោកក៏មិនទទួលយកការរៀបចំពីអន្តរជាតិណាមួយដែលមានបំណងឲ្យលោកជួបលោក សម រង្ស៊ី និងក្រុមថ្នាក់ដឹកនាំគណបក្សប្រឆាំង ដើម្បីជជែកពីបញ្ហានយោបាយនៅកម្ពុជានោះដែរ។ លោកថា ក្រុមអតីតមន្ត្រីគណបក្សប្រឆាំងបានប្រព្រឹត្តខុសច្បាប់ ដោយប៉ុនប៉ងផ្តួលរំលំលោកពីអំណាចតាមរយៈការអំពាវនាវឲ្យកងទ័ពប្រឆាំងរាជរដ្ឋាភិបាល និងឲ្យប្រជាពលរដ្ឋខ្មែរនៅក្រៅប្រទេសធ្វើបាតុកម្មនៅគ្រប់ទីកន្លែងជាដើម។
លោកបញ្ជាក់ថា៖
«ហើយខ្ញុំសុំផ្តាំផ្ញើទៅមិត្តភក្តិបរទេសដែលមានចេតនាណាមួយរៀបចំឲ្យមានការសន្ទនាជាមួយក្រុមគាត់។ ជាតិនេះ ខ្ញុំនឹងមិនធ្វើទេ! សុំកុំមកនិយាយជាមួយខ្ញុំ។ ហើយខ្ញុំក៏មិនទទួលនូវការសន្ទនាជាមួយជនបរទេសណាក៏ដោយ ដែលប៉ុនប៉ង មកទាក់ទាញខ្ញុំឲ្យចរចាជាមួយអាក្រុមនេះ»។
ការថ្លែងរបស់លោកនាយករដ្ឋមន្រ្តី កើតឡើងបន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិ បានបង្ហោះសារលើបណ្តាញសង្គមរបស់លោកកាលពីថ្ងៃអាទិត្យនេះថា លោកត្រៀមខ្លួនក្នុងការជួបសន្ទនាជាមួយលោក ហ៊ុន សែន ដើម្បីរកដំណោះស្រាយជូនប្រទេសកម្ពុជា។
 |
| លោក សម រង្ស៊ី អតីតប្រធានគណបក្សសង្គ្រោះជាតិ ថ្លែងទៅកាន់អ្នកគាំទ្រគណបក្សតាមរយៈវីដេអូបង្ហោះតាមប្រព័ន្ធអ៊ីនធឺណិត ពីប្រទេសអ៊ីតាលី កាលពីថ្ងៃទី៣០ ខែតុលា ឆ្នាំ២០១៧។ (រូបដកស្រង់ពីវីដេអូ) |
លោក សម រង្ស៊ី សរសេរក្នុងន័យដើមថា៖
«ខ្ញុំត្រៀមខ្លួនជានិច្ច ជួបសន្ទនាជាមួយរដ្ឋាភិបាលលោក ហ៊ុន សែន ដើម្បីស្វែងរកដំណោះស្រាយមួយដោយសន្តិវិធី ចំពោះវិបត្តិដែលមិនដែលមានដូចសព្វថ្ងៃ តែជាដំណោះស្រាយមួយដែលភាគីទាំងពីរអាចទទួលយកបាន ហើយដែលមានការធានាពីអន្តរជាតិផងដែរ»។
គណបក្សសង្គ្រោះជាតិត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧កន្លងទៅ តាមបណ្តឹងរបស់ក្រសួងមហាផ្ទៃដែលបានចោទថា គណបក្សនេះឃុបឃិតជាមួយបរទេសដើម្បីផ្តួលរំលំរដ្ឋាភិបាលដឹកនាំដោយលោកនាយករដ្ឋមន្រ្តី ហ៊ុន សែន។ ចំណែកអតីតមន្រ្តី និងតំណាងរាស្រ្តគណបក្សនេះចំនួន១១៨នាក់ត្រូវបានហាមឃាត់សិទ្ធិធ្វើនយោបាយម្នាក់ៗ៥ឆ្នាំ ខណៈដែលលោក កឹម សុខា ដែលជាប្រធានគណបក្សកំពុងជាប់ឃុំក្នុងពន្ធនាគារដោយរងការចោទពីបទល្មើសដូចគ្នា។ ការណ៍នេះធ្វើឲ្យអតីតមន្រ្តីជាន់ខ្ពស់ និងតំណាងរាស្រ្តគណបក្សនេះជាងពាក់កណ្តាលបានភៀសខ្លួនទៅបរទេស។
 |
| រូបឯកសារ៖ លោកបណ្ឌិត ឡៅ ម៉ុងហៃ អ្នកវិភាគឯករាជ្យចូលរួមជាវាគ្មិននៅក្នុងកម្មវិធីវិទ្យុ ហេឡូវីអូអេ នៅក្នុងបន្ទប់ផ្សាយ VOA នៅក្រុងភ្នំពេញ។ (លឹម សុធី/VOA) |
លោក ឡៅ ម៉ុងហៃ អ្នកវិភាគនយោបាយឯករាជ្យ ប្រាប់ VOA ថា រដ្ឋាភិបាលគួរតែបើកឲ្យមានការចរចាជាមួយគណបក្សប្រឆាំង ដើម្បីបង្ហាញពីការដោះស្រាយបញ្ហានយោបាយដែលកំពុងជាប់គាំងដោយខ្មែរ និងខ្មែរ។ លោកបន្ថែមថា ប្រសិនបើគណបក្សកាន់អំណាច និងគណបក្សប្រឆាំងដែលត្រូវបានរំលាយមានការចរចាគ្នា នោះផលប្រយោជន៍សម្រាប់ជាតិ និងប្រជាពលរដ្ឋនឹងកើតមាន។
លោកមានប្រសាសន៍ថា៖
«អាមេរិកក៏ដោយ សហគមន៍អឺរ៉ុបក៏ដោយ តាមពិតទៅគេជួយយើងទៅវិញទេ។ គេមិនចង់ទៅដាក់ទណ្ឌកម្មអី ហើយអាចឈានទៅដល់ទណ្ឌកម្មសេដ្ឋកិច្ចដែលធ្វើឲ្យប្រជាពលរដ្ឋយើងលំបាកវេទនានោះទេ។ ហើយគេទាមទារថា យើងត្រូវគោរពលទ្ធិប្រជាធិបតេយ្យ សេរីពហុបក្ស នីតិរដ្ឋ គោរពសិទ្ធិមនុស្សហ្នឹងផលប្រយោជន៍នរណា? មិនមែនផលប្រយោជន៍គេឯណា? ផលប្រយោជន៍ប្រទេសយើង។ ផលប្រយោជន៍ប្រជាពលរដ្ឋខ្មែរយើង ព្រោះមុនៗដោយសារវាអត់មានលទ្ធិប្រជាធិបតេយ្យ អត់មានសិទ្ធិមនុស្ស អត់មាននីតិរដ្ឋហ្នឹងហើយ បានកាប់សម្លាប់គ្នា»។
កាលពីថ្ងៃអង្គារសប្តាហ៍មុន ក្រុមប្រឹក្សាសហភាពអឺរ៉ុប និងសហរដ្ឋអាមេរិកបានជំរុញឲ្យមានការដាក់ទណ្ឌកម្មសេដ្ឋកិច្ច និងផ្ដាច់ជំនួយអភិវឌ្ឍន៍ជាច្រើនមកកម្ពុជា ដោយពួកគេចោទថា រដ្ឋាភិបាលកម្ពុជាបានធ្វើសកម្មភាពប្រឆាំងនឹងលទ្ធិប្រជាធិបតេយ្យ និងមិនអើពើជុំវិញការទទូចឲ្យមានការស្ដារលទ្ធិប្រជាធិបតេយ្យនៅកម្ពុជាឡើងវិញ។
មន្រ្តីជាន់ខ្ពស់រដ្ឋាភិបាលលើកឡើងថា ការកាត់ជំនួយរបស់អន្តរជាតិដោយលើកហេតុផលថា លទ្ធិប្រជាធិបតេយ្យនៅកម្ពុជាកំពុងដើរថយក្រោយគឺជាការវាយតម្លៃខុសពីការណ៍ពិត និងថា រដ្ឋាភិបាលកម្ពុជាកំពុងអនុវត្តច្បាប់ឲ្យស្របតាមគោលការណ៍លទ្ធិប្រជាធិបតេយ្យ៕
Comments
Post a Comment